മരുന്ന് വില്പനയുടെ മറവിൽ ലഹരി മരുന്ന് കച്ചവടം; തൃശ്ശൂരിൽ മെഡിക്കൽ റെപ്രസെൻ്റേറ്റീവ് പിടിയിൽ

മരുന്ന് വില്പനയുടെ മറവിൽ ലഹരി മരുന്ന് കച്ചവടം ചെയ്ത മെഡിക്കൽ റെപ്രസെൻ്റേറ്റീവ് എക്സെെസിൻ്റെ പിടിയിൽ. പെരിങ്ങണ്ടൂർ സ്വദേശി മിഥുന്‍ (24) ആണ് അറസ്റ്റിലായത്. ഇയാളില്‍ നിന്നും രണ്ട് കിലോ കഞ്ചാവും രണ്ട് ഗ്രാം എംഡിഎംഎയും കണ്ടെടുത്തു. മധ്യമേഖല എക്‌സൈസ് കമ്മീഷണർ സ്‌ക്വാഡിന് ലഭിച്ച രഹസ്യ വിവരത്തിൻ്റെ അടിസ്ഥാനത്തിൽ ആയിരുന്നു പരിശോധന. തൃശ്ശൂര്‍ ഗവ.മെഡിക്കൽ കോളേജ് പരിസരത്തു നിന്നുമാണ് മിഥുന്‍ പിടിയിലായത്. എക്‌സൈസ് കമ്മീഷണർ സ്‌ക്വാഡും കൊലഴി റേഞ്ചും തൃശ്ശൂർ സ്പെഷ്യൽ സ്‌ക്വാഡും ചേർന്നാണ് പരിശോധന നടത്തിയത്. പിടികൂടുമ്പോള്‍ രണ്ട് കിലോ കഞ്ചാവും രണ്ടു ഗ്രാം എംഡിഎംഎയും പ്രതിയിൽ നിന്നും കണ്ടെടുത്തു. മിഥുൻ വൻതോതിൽ കഞ്ചാവും എംഡിഎംഎയും ശേഖരിച്ചു ചെറിയ പൊതികൾ ആക്കി വില്പന നടത്തി വരികയായിരുന്നുവെന്ന് എക്സെെസ് അറിയിച്ചു. മെഡിക്കൽ റെപ്രസെൻ്റേറ്റീവ് ജോലിയുടെ മറവിൽ മരുന്ന് എന്ന വ്യാജേനയാണ് പ്രതി മയക്കുമരുന്ന് ആവശ്യകാർക്ക് വിതരണം ചെയ്തിരുന്നത്. കഞ്ചാവ് തമിഴ്നാട്ടില്‍ നിന്നും എംഡിഎംഎ ബാംഗ്ലൂരിൽ നിന്നുമാണ് വാങ്ങിയതെന്ന് പ്രതി സമ്മതിച്ചതായും എക്സെെസ് അറിയിച്ചു